4.1MBH-3-4-1
वैशंपायन उवाच । ततो दिवाकरः प्रीतो दर्शयामास पाण्डवम् । दीप्यमानः स्ववपुषा ज्वलन्निव हुताशनः ॥
vaiśaṁpāyana uvāca । tato divākaraḥ prīto darśayām āsa pāṇḍavam । dīpyamānaḥ svavapuṣā jvalann iva hutāśanaḥ ॥
Vana Parva · Adhyaya 3.4
Adhyāya 4
अध्यायः 4
Who speaks here वैशंपायन vaiśaṃpāyana
English for this adhyāya (section level, not verse by verse): Ganguli’s translation, approximately §2–4 Ganguli follows a different edition, so the match is approximate.
In this chapterSanskrit allTransliteration allHindi unavailableEnglish unavailableUnavailable translations are marked, never invented.
4.2MBH-3-4-2
यत्तेऽभिलषितं राजन्सर्वमेतदवाप्स्यसि । अहमन्नं प्रदास्यामि सप्त पञ्च च ते समाः ॥
yat te ’bhilaṣitaṁ rājan sarvam etad avāpsyasi । aham annaṁ pradāsyāmi sapta pañca ca te samāḥ ॥
4.3MBH-3-4-3
फलमूलामिषं शाकं संस्कृतं यन्महानसे । चतुर्विधं तदन्नाद्यमक्षय्यं ते भविष्यति । धनं च विविधं तुभ्यमित्युक्त्वान्तरधीयत ॥
phalamūlāmiṣaṁ śākaṁ saṁskr̥taṁ yan mahānase । caturvidhaṁ tadannādyam akṣayyaṁ te bhaviṣyati । dhanaṁ ca vividhaṁ tubhyam ity uktvāntaradhīyata ॥
4.4MBH-3-4-4
लब्ध्वा वरं तु कौन्तेयो जलादुत्तीर्य धर्मवित् । जग्राह पादौ धौम्यस्य भ्रातॄंश्चास्वजताच्युतः ॥
labdhvā varaṁ tu kaunteyo jalād uttīrya dharmavit । jagrāha pādau dhaumyasya bhrātr̥̄ṁś cāsvajatācyutaḥ ॥
4.5MBH-3-4-5
द्रौपद्या सह संगम्य पश्यमानोऽभ्ययात्प्रभुः । महानसे तदान्नं तु साधयामास पाण्डवः ॥
draupadyā saha saṁgamya paśyamāno ’bhyayāt prabhuḥ । mahānase tadānnaṁ tu sādhayām āsa pāṇḍavaḥ ॥
4.6MBH-3-4-6
संस्कृतं प्रसवं याति वन्यमन्नं चतुर्विधम् । अक्षय्यं वर्धते चान्नं तेन भोजयते द्विजान् ॥
saṁskr̥taṁ prasavaṁ yāti vanyam annaṁ caturvidham । akṣayyaṁ vardhate cānnaṁ tena bhojayate dvijān ॥
4.7MBH-3-4-7
भुक्तवत्सु च विप्रेषु भोजयित्वानुजानपि । शेषं विघससंज्ञं तु पश्चाद्भुङ्क्ते युधिष्ठिरः । युधिष्ठिरं भोजयित्वा शेषमश्नाति पार्षती ॥
bhuktavatsu ca vipreṣu bhojayitvānujān api । śeṣaṁ vighasasaṁjñaṁ tu paścād bhuṅkte yudhiṣṭhiraḥ । yudhiṣṭhiraṁ bhojayitvā śeṣam aśnāti pārṣatī ॥
4.8MBH-3-4-8
एवं दिवाकरात्प्राप्य दिवाकरसमद्युतिः । कामान्मनोऽभिलषितान्ब्राह्मणेभ्यो ददौ प्रभुः ॥
evaṁ divākarāt prāpya divākarasamadyutiḥ । kāmān mano ’bhilaṣitān brāhmaṇebhyo dadau prabhuḥ ॥
4.9MBH-3-4-9
पुरोहितपुरोगाश्च तिथिनक्षत्रपर्वसु । यज्ञियार्थाः प्रवर्तन्ते विधिमन्त्रप्रमाणतः ॥
purohitapurogāś ca tithinakṣatraparvasu । yajñiyārthāḥ pravartante vidhimantrapramāṇataḥ ॥
4.10MBH-3-4-10
ततः कृतस्वस्त्ययना धौम्येन सह पाण्डवाः । द्विजसंघैः परिवृताः प्रययुः काम्यकं वनम् ॥
tataḥ kr̥tasvastyayanā dhaumyena saha pāṇḍavāḥ । dvijasaṁghaiḥ parivr̥tāḥ prayayuḥ kāmyakaṁ vanam ॥