42.1MBH-12-42-1
वैशंपायन उवाच । ततो युधिष्ठिरो राजा ज्ञातीनां ये हता मृधे । श्राद्धानि कारयामास तेषां पृथगुदारधीः ॥
vaiśaṁpāyana uvāca । tato yudhiṣṭhiro rājā jñātīnāṁ ye hatā mr̥dhe । śrāddhāni kārayām āsa teṣāṁ pr̥thag udāradhīḥ ॥
Śānti Parva · Adhyaya 12.42
Adhyāya 42
अध्यायः 42
Who speaks here वैशंपायन vaiśaṃpāyana
English for this adhyāya (section level, not verse by verse): Ganguli’s translation, approximately §42–44 Ganguli follows a different edition, so the match is approximate.
In this chapterSanskrit allTransliteration allHindi unavailableEnglish unavailableUnavailable translations are marked, never invented.
42.2MBH-12-42-2
धृतराष्ट्रो ददौ राजा पुत्राणामौर्ध्वदेहिकम् । सर्वकामगुणोपेतमन्नं गाश्च धनानि च । रत्नानि च विचित्राणि महार्हाणि महायशाः ॥
dhr̥tarāṣṭro dadau rājā putrāṇām aurdhvadehikam । sarvakāmaguṇopetam annaṁ gāś ca dhanāni ca । ratnāni ca vicitrāṇi mahārhāṇi mahāyaśāḥ ॥
42.3MBH-12-42-3
युधिष्ठिरस्तु कर्णस्य द्रोणस्य च महात्मनः । धृष्टद्युम्नाभिमन्युभ्यां हैडिम्बस्य च रक्षसः ॥
yudhiṣṭhiras tu karṇasya droṇasya ca mahātmanaḥ । dhr̥ṣṭadyumnābhimanyubhyāṁ haiḍimbasya ca rakṣasaḥ ॥
42.4MBH-12-42-4
विराटप्रभृतीनां च सुहृदामुपकारिणाम् । द्रुपदद्रौपदेयानां द्रौपद्या सहितो ददौ ॥
virāṭaprabhr̥tīnāṁ ca suhr̥dām upakāriṇām । drupadadraupadeyānāṁ draupadyā sahito dadau ॥
42.5MBH-12-42-5
ब्राह्मणानां सहस्राणि पृथगेकैकमुद्दिशन् । धनैश्च वस्त्रै रत्नैश्च गोभिश्च समतर्पयत् ॥
brāhmaṇānāṁ sahasrāṇi pr̥thag ekaikam uddiśan । dhanaiś ca vastrai ratnaiś ca gobhiś ca samatarpayat ॥
42.6MBH-12-42-6
ये चान्ये पृथिवीपाला येषां नास्ति सुहृज्जनः । उद्दिश्योद्दिश्य तेषां च चक्रे राजौर्ध्वदैहिकम् ॥
ye cānye pr̥thivīpālā yeṣāṁ nāsti suhr̥jjanaḥ । uddiśyoddiśya teṣāṁ ca cakre rājaurdhvadaihikam ॥
42.7MBH-12-42-7
सभाः प्रपाश्च विविधास्तडागानि च पाण्डवः । सुहृदां कारयामास सर्वेषामौर्ध्वदैहिकम् ॥
sabhāḥ prapāś ca vividhās taḍāgāni ca pāṇḍavaḥ । suhr̥dāṁ kārayām āsa sarveṣām aurdhvadaihikam ॥
42.8MBH-12-42-8
स तेषामनृणो भूत्वा गत्वा लोकेष्ववाच्यताम् । कृतकृत्योऽभवद्राजा प्रजा धर्मेण पालयन् ॥
sa teṣām anr̥ṇo bhūtvā gatvā lokeṣv avācyatām । kr̥takr̥tyo ’bhavad rājā prajā dharmeṇa pālayan ॥
42.9MBH-12-42-9
धृतराष्ट्रं यथापूर्वं गान्धारीं विदुरं तथा । सर्वांश्च कौरवामात्यान्भृत्यांश्च समपूजयत् ॥
dhr̥tarāṣṭraṁ yathāpūrvaṁ gāndhārīṁ viduraṁ tathā । sarvāṁś ca kauravāmātyān bhr̥tyāṁś ca samapūjayat ॥
42.10MBH-12-42-10
याश्च तत्र स्त्रियः काश्चिद्धतवीरा हतात्मजाः । सर्वास्ताः कौरवो राजा संपूज्यापालयद्घृणी ॥
yāś ca tatra striyaḥ kāś cid dhatavīrā hatātmajāḥ । sarvās tāḥ kauravo rājā saṁpūjyāpālayad ghr̥ṇī ॥
42.11MBH-12-42-11
दीनान्धकृपणानां च गृहाच्छादनभोजनैः । आनृशंस्यपरो राजा चकारानुग्रहं प्रभुः ॥
dīnāndhakr̥paṇānāṁ ca gr̥hācchādanabhojanaiḥ । ānr̥śaṁsyaparo rājā cakārānugrahaṁ prabhuḥ ॥
42.12MBH-12-42-12
स विजित्य महीं कृत्स्नामानृण्यं प्राप्य वैरिषु । निःसपत्नः सुखी राजा विजहार युधिष्ठिरः ॥
sa vijitya mahīṁ kr̥tsnām ānr̥ṇyaṁ prāpya vairiṣu । niḥsapatnaḥ sukhī rājā vijahāra yudhiṣṭhiraḥ ॥