Who speaks here वैशंपायन vaiśaṃpāyana
English for this adhyāya (section level, not verse by verse): Ganguli’s translation, approximately §166–168 Ganguli follows a different edition, so the match is approximate.
वैशंपायन उवाच । तूष्णींभूते तदा भीष्मे पटे चित्रमिवार्पितम् । मुहूर्तमिव च ध्यात्वा व्यासः सत्यवतीसुतः । नृपं शयानं गाङ्गेयमिदमाह वचस्तदा ॥
vaiśaṁpāyana uvāca । tūṣṇīṁbhūte tadā bhīṣme paṭe citram ivārpitam । muhūrtam iva ca dhyātvā vyāsaḥ satyavatīsutaḥ । nr̥paṁ śayānaṁ gāṅgeyam idam āha vacas tadā ॥
राजन्प्रकृतिमापन्नः कुरुराजो युधिष्ठिरः । सहितो भ्रातृभिः सर्वैः पार्थिवैश्चानुयायिभिः ॥
rājan prakr̥tim āpannaḥ kururājo yudhiṣṭhiraḥ । sahito bhrātr̥bhiḥ sarvaiḥ pārthivaiś cānuyāyibhiḥ ॥
उपास्ते त्वां नरव्याघ्र सह कृष्णेन धीमता । तमिमं पुरयानाय त्वमनुज्ञातुमर्हसि ॥
upāste tvāṁ naravyāghra saha kr̥ṣṇena dhīmatā । tam imaṁ purayānāya tvam anujñātum arhasi ॥
एवमुक्तो भगवता व्यासेन पृथिवीपतिः । युधिष्ठिरं सहामात्यमनुजज्ञे नदीसुतः ॥
evam ukto bhagavatā vyāsena pr̥thivīpatiḥ । yudhiṣṭhiraṁ sahāmātyam anujajñe nadīsutaḥ ॥
उवाच चैनं मधुरं ततः शांतनवो नृपः । प्रविशस्व पुरं राजन्व्येतु ते मानसो ज्वरः ॥
uvāca cainaṁ madhuraṁ tataḥ śāṁtanavo nr̥paḥ । praviśasva puraṁ rājan vyetu te mānaso jvaraḥ ॥
यजस्व विविधैर्यज्ञैर्बह्वन्नैः स्वाप्तदक्षिणैः । ययातिरिव राजेन्द्र श्रद्धादमपुरःसरः ॥
yajasva vividhair yajñair bahvannaiḥ svāptadakṣiṇaiḥ । yayātir iva rājendra śraddhādamapuraḥsaraḥ ॥
क्षत्रधर्मरतः पार्थ पितॄन्देवांश्च तर्पय । श्रेयसा योक्ष्यसे चैव व्येतु ते मानसो ज्वरः ॥
kṣatradharmarataḥ pārtha pitr̥̄n devāṁś ca tarpaya । śreyasā yokṣyase caiva vyetu te mānaso jvaraḥ ॥
रञ्जयस्व प्रजाः सर्वाः प्रकृतीः परिसान्त्वय । सुहृदः फलसत्कारैरभ्यर्चय यथार्हतः ॥
rañjayasva prajāḥ sarvāḥ prakr̥tīḥ parisāntvaya । suhr̥daḥ phalasatkārair abhyarcaya yathārhataḥ ॥
अनु त्वां तात जीवन्तु मित्राणि सुहृदस्तथा । चैत्यस्थाने स्थितं वृक्षं फलवन्तमिव द्विजाः ॥
anu tvāṁ tāta jīvantu mitrāṇi suhr̥das tathā । caityasthāne sthitaṁ vr̥kṣaṁ phalavantam iva dvijāḥ ॥
आगन्तव्यं च भवता समये मम पार्थिव । विनिवृत्ते दिनकरे प्रवृत्ते चोत्तरायणे ॥
āgantavyaṁ ca bhavatā samaye mama pārthiva । vinivr̥tte dinakare pravr̥tte cottarāyaṇe ॥
तथेत्युक्त्वा तु कौन्तेयः सोऽभिवाद्य पितामहम् । प्रययौ सपरीवारो नगरं नागसाह्वयम् ॥
tathety uktvā tu kaunteyaḥ so ’bhivādya pitāmaham । prayayau saparīvāro nagaraṁ nāgasāhvayam ॥
धृतराष्ट्रं पुरस्कृत्य गान्धारीं च पतिव्रताम् । सह तैरृषिभिः सर्वैर्भ्रातृभिः केशवेन च ॥
dhr̥tarāṣṭraṁ puraskr̥tya gāndhārīṁ ca pativratām । saha tair r̥ṣibhiḥ sarvair bhrātr̥bhiḥ keśavena ca ॥
पौरजानपदैश्चैव मन्त्रिवृद्धैश्च पार्थिवः । प्रविवेश कुरुश्रेष्ठ पुरं वारणसाह्वयम् ॥
paurajānapadaiś caiva mantrivr̥ddhaiś ca pārthivaḥ । praviveśa kuruśreṣṭha puraṁ vāraṇasāhvayam ॥